Ո՞Ր ԲՈՒՅՐԵՐՆ ԵՆ ՄԱՐԴԿԱՆՑ ՍՏԻՊՈՒՄ ԱՎԵԼԻ ՇԱՏ ԾԱԽՍԵԼ
Ճիշտ ընտրված հնչյուններն ու բույրերը պահում են գնորդին, իսկ անհաջողները՝ վանում:
Սենսորային (շոշափելի)մարքեթինգը՝ սպառողների վրա ազդեցություն գործելը բույրերի ու հնչյունների միջոցով, բավականին տարածված է արտասահմանում:
Սենսորային մարքեթինգի արդյունավետությունը ապացուցված է տարատեսակ ուսումնասիրությունների, հոգեբանական փորձարկումների միջոցով: Իհարկե, ոչ ոք չի կարող կանխատեսել, թե որքանով կավելանա խանութի շահույթը, եթե այնտեղ հանկարծակի սկսի թարմ թխված խմորեղենի բույր տարածվել, բայց այն, որ բույրերը միանշանակորեն ազդում են տրամադրության վրա, փաստ է: Իսկ եթե սպառողն ունի լավ տրամադրություն, ապա նա ավելի հեշտ է բաժանվում իր քսակի պարունակությունից:
Արոմամարքեթինգի ինստիտուտը կազմել է բույրերի ցուցակը, որն ավելի հաճախ է ազդում գնորդի վարքագծի վրա: Ահա թե ինչ ազդեցություն են գործում դրանք.
Տալկ (ցանափոշի)-պաշտպանվածության զգացողություն, կարոտի զգացում:
Անանուխ, ցիտրուսային– ուշադրություն, զգոնություն:
Նարդոս(լավանդա), վանիլին, երիցուկ– լիցքաթափում:
Ծխահոտ– տարածքն ավելի փոքր է թվում:
Խնձոր, վարունգ– տարածքն ավելի ընդարձակ է թվում:
Կաշվի և եղևնու բույր– օգնում է վաճառել թանկարժեք կահույք:
Թարմ խմորեղենի բույր– ընտանեկան հարմարավետության զգացողություն:
Ծաղկային ու ցիտրուսային բույրեր– ստիպում են խանութում մնալ ավելի երկար ու ծախսել ավելի շատ:
Իհարկե, այս բույրերի ազդեցությունն օգտագործելիս պետք է հաշվի առնել նաև տվյալ երկրի բնակչության առանձնահատկությունները:
Օրինակ՝ Ռուսաստանում կինոթատրոններից մեկն իր սրահում տարածել էր վարունգի և անանուխի բույր, որը, ինչպես նշվում էր, օգնում է կենտրոնանալ, սակայն ռուս հանդիսատեսին այն նյարդայնացրեց, քանի որ այդ բույրը նրանց մոտ ասոցացվում էր Խորհրդային միությունում տարածված «Огуречный» օդեկոլոնի հետ: Թարմության զգացողության փոխարեն հանդիսատեսի մոտ առաջացավ գրգռվածություն:
