ՌԴ ԿԵՆՏՐՈՆԱԿԱՆ ԲԱՆԿՆ Ի ՎԻՃԱԿԻ ՉԷ ԱՊԱՀՈՎԵԼ ՌՈՒԲԼՈՒ ՓՈԽԱՐԺԵՔԻ ԿԱՅՈՒՆՈՒԹՅՈՒՆԸ
ՌԴ Կենտրոնական բանկն առայժմ ի վիճակի չէ ապահովել ռուբլու փոխարժեքի կայունությունը՝ մեղմելու համար արժույթի փոփոխականությունը: Այս մասին հայտնել է ՌԴ ԿԲ առաջին փոխնախագահ Դմիտրի Տուլինը:
«Մենք շատ կցանկանայինք, որպեսզի ռուբլու փոխարժեքն արտարժույթի զամբյուղում կայուն լիներ: Դա շատ նպաստավոր կլիներ տնտեսության եւ հակաճգնաժամային քաղաքականության համար: Սակայն դա ապահովելն անհնար է: Պետք է մտածել այն մասին, թե ինչպես կարող ենք մեղմել արտարժույթի տատանումների հետեւանքները»,-հայտարարել է Տուլինը:
Ըստ նրա, չեն կանխատեսվում փոխարժեքի այնպիսի վայրիվերումներ, ինչպիսիք արձանագրվեցին 2014թ.-ին:
«Մեր կանխատեսումն ու գնահատականն այսպիսին է. ռուբլու փոխարժեքը չի լինի կայուն այնպես, ինչպես մինչ 2014թ.-ի նոյեմբերին էր, չի լինի նաեւ այնքան փոփոխական, ինչպես դեկտեմբեր-հունվար ամիսներին էր»,-հայտարարել է ՌԴ ԿԲ փոխնախագահը:
Առանցքային գործոնը, որն ազդում է ռուբլու փոխարժեքի վրա, նավթի միջազգային գինն է, թեեւ, ինչպես նշում են ԿԲ-ի մասնագետները, ռուսաստանյան արժույթի՝ նավթի գներից կախվածության աստիճանը նվազել է:
Աղբյուր՝ «ՌԻԱ Նովոստի»
Թարգմ.՝ Էդուարդ Մխիթարյան
